Ua faagasolo i lenei vaiaso i lo tatou atunuu polokalame faatino a le matāgaluega o le soifua mālōlōina ua faatāua ai le faasusu o pepe i o latou tinā o se tasi o puipuiga lelei mo le ola tuputupu a’e o fanau.

O le Minisita o le matāgaluega sa ia tatala aloa’ia lea polokalame ma faailoa ai foi ni taavale avema’i fou o se foa’i a Iapani ma le UNICEF mo le soifua mālōlōina.

O le minisita foi o le soifua mālōlōina le afioga Valasi Luapitofanua Toogamaga Tafito Selesele na ia faailoa i lea sauniga i le Aso Faraile na te’a nei le amata ai ona faaaogā o le vailaau mo tuipuipui o fanau ua faaigoaina o le Hexavalent.

E tasi le tui ae mafai ona puipuia ai fanau mai faama’i e pei o le lipi, tale vivini, nimonia, ate fefete, ma’i pipili ma le ‘ona.