Ua mae’a i le Aso Gafua o lenei vaiaso le masina o Iuni ma ua faamuta ai ma le faasoa a le malo mai le tala o le tupe o le tausaga faaletupe 2024 i le 2025.
Ua aapa ai nei le malo i le 300 miliona o le 25 pasene o lea tala autū o le tupe e faasoasoa mo masina amata atu ia Iulai, ona ua teena le tala o le tupe sa fuafua mo le isi 12 masina e amata i le amataga o le masina fou o Iulai.
O le 300 miliona tala ua faaalia e le Minisita o Tupe o le a faamuamua ai totogi o tagata faigaluega uma a le malo, ma auaunaga e sili ona mana’omia e aofia ai ma le ave i fafo o ni gasegase.
E pei ona silafia o le teena o le tala o le tupe ma mafua ai ona fautuaina le Ao o le Malo e le Palemia e faatā’ape le Palemene ona ua leai se faatuatuaga o le pulega o le malo, ua mafua ai ona faaaogā le 25 pasene o le aofa’iga o le tala autū o le tupe o le tausaga faaletupe o le a mae’a, e faagaioia ai galuega a le malo se’ia tula’i mai se faigāmalo fou i le mae’a o le palota tele ia Aokuso.
Faaalia e le Minisita o Tupe ua avea le teena o le tapenaga o le tala o le tupe ma aafiaga tele i fuafuaga sa faataoto e le malo, e pei o le siitaga o totogi o malu o le malo poo leoleo ua tele tausaga e le’i toe faatinoina lea tulaga, le siitaga o le penisione o tagata matutua i le 300 tala i le masina ae 150 tala i le masina mo tagata e aafiaga tumau, ae sa fuafua ai foi ma se siitaga maualuga o fesoasoani a le malo e tuuina atu i pisinisi laiti mo le atina’eina.
Le afioga Lautimuia Afoa Uelese Vaai o le Minisita o tupe a le malo tausi.
