E tolu kolisi maualuluga i le motu o Savaii ua afea i le polokalame fesoasoani a le Matāgaluega o Faato’aga ma Faigafaiva lea e ta’u faapuupuu o le SAFPROM, e pei ona muamua tauaao atu i le kolisi o Asau meafaigaluega mo le faia o togālaau’aina.
O le faamoemoe autū o le matāgaluega ia maua e fanau o loo a’oa’oina le matāupu o faato’aga, le tomai ma amata faata’ita’i loa i le faia o togālaau’aina mo le kolisi i le sini taula’i ia mae’a le a’oga, ma siitia le a’oa’oga o matāupu tau faato’aga ae ua iai se amataga lelei.
O le kolisi foi o Sagato Iosefo le tasi o a’oga maualuga ua mae’a tauaao iai meafaigaluega mo galuega tau faato’aga i le faamoemoe e faatino ai togālaau’aina.
O le polokalame lea a le matāgaluega sa tauaao ai foi e nisi o le aufaifaato’aga fesoasoani o meafaigaluega ma isi oloa e faaaogā i le atina’e o faato’aga.
