O le aso ananafi na faia ai e le afioga i le Palemia o Niu Sila, Christopher Luxon le faasilasilaga ua toe faataga ai tagata mauoloa mai isi atunuu o loo fia invesi poo foreign investors ona latou mauaina le visa ua ta’ua o le “golden visa” e mafai ai ona latou faatauina fale taugatā i totonu o Niu Sila, o se matāupu sa iai se taofiga muamua ae o lea ua toe matala mai.
O lenei faasilasilaga ua faia ina ua mae’a le tele o masina o ni soālaupulega i le va o le vaega a le National ma le New Zealand First, ona o le New Zealand First lea sa galulue faatasi ma le Labour a o avea ma malo soofaatasi, i le faatulagaina o lena sā i le tausaga e 2018.
I le faasilasilaga lea ananafi ua faailoa ai e le Palemia, o le tagata e agavaa mo le mauaina o lea visa, le Active Investor Plus, o le a mafai ona ia faatauina se fale pe fauina sona fale fou i se tau a itiiti mai e $5 miliona tālā.
Saunoa Luxon, o se fuafuaga ina ia atili malosi ai investments poo le faafaigaluegaina o tupe i totonu o le atunuu ma faaopoopo ai foi nisi galuega fou.
I se tusitusiga a le ta’ita’i o le New Zealand First, afioga Vaovasamanaia Winston Peters i luga o le upega tafa’ilagi o le X, o loo ia saunoa ai, o lenei fuafuaga ua faia e le malo, ae e iai faatasi ma ni faataupaulaa maumaututū e pei o le lē mafai ona faatauina ni laufanua i nofoaga maotua (rural land), o fanua mo faato’aga (farm land), ma fanua faasao poo fanua e iai ni o latou tala’aga tāua ma patino i le atunuu (sensitive land).
Saunoa Peters, o le tupe amata o le $5 miliona ua faatulaga atu mo tagata inivesi mai isi atunuu e faatau ai ni o latou fale, e lē o aofia ai le silia ma le 99 pasene o fale a Niu Sila o loo faatau i luga o le maketi o fale, o se faiga lea ina ia puipuia ai le soona faatauina atu o nei fale i tagata ese mai isi atunuu.
Saunoa Peters, o se faiga talafeagai lea, ina ia lē gata e mautinoa ai pea o loo lava fale o o loo faatau ma e gafatia e tagata ona faatau i totonu o Niu Sila, ae i le taimi e tasi o loo tatou faataga ai foi tagata o loo manana’o e inivesi le faitau fia miliona o a latou tupe i totonu o le tamaoaiga o le atunuu, e ala i le mafai ona faatauina ni o latou fale e nonofo ai a o aumau ai i totonu o Niu Sila.
Puna o Faamatalaga: https://www.rnz.co.nz/news/political/571695/watch-pm-announcement-on-new-exemption-to-foreign-buyers-ban?cid=newsletter
