I le faamautū ai nei o le faia o le isi palota aoao a le atunuu i le faai’uga o Aokuso, o le momoli atu ai o sui faatutū i vaega faaupufai ua molimauina ai i tapenaga a le pati e puipuia aiātatau a tagata, le faasee tuāgalu ai o se tasi o tinā sa tauaveina le tofi Faipule o le itumalo o Gagaifomauga 1 le tofa Faimalotoa Kika Iemaima Stowers Ah Kau, o le a lē tauva ae ua ave lana lagolago i se tasi o sui faatū ua tusi aao iai lona itumalo o le tofa Timu Iakopo Timu.
Ata: HRPP party
Timu Iakopo Timu. Ata: HRPP party
O le Aso Tofi na momoli atu ai i le vaega faaupufai e puipuia aiātatau a tagata lea sui faatū mo le tofi faaolioli o Gagaifomauga Muamua, na faailoa ai le faasee tuāgalu o le tofa Faimalotoa ma faafetaia ai e le ta’ita’i o le vaega faaupufai le susuga Tuilaepa L Sailele Malielegaoi le tautua a lē sa avea ma Faipule o le itumalo, e pei ona sa avea ai ma Minisita o le Kapeneta mo le matāgaluega o tinā ma tamaitai, faapea le matāgaluega o le soifua mālōlōina a o tauave e le HRPP le pulega o le malo.
O lona avea ai ma Minisita o le Soifua Mālōlōina sa feagai ai ma se lu’itau ina ua pepesi le faama’i misela ma fano ai ola ma soifua e 83, na sosoo ai ma le pipisi o le faama’i mata’utia o le Koviti-19 i le tausaga e 2020 a o tapena le atunuu i le palota tele o le tausaga e 2021.
I faamaumauga o loo faailoa ai o le palota laitiiti a Gagaifomauga 1 i le tausaga e 2014 na ulua’i pale ai le tofa Faimalotoa Kika Iemaima Stowers Ah Kau i le tofi Faipule o le Palemene.
O lea palota laitiiti na mafua mai ina ua tuumalo lē sa avea ma faipule o le itumalo i lea vaitau le tofa Tuilo’a Toeulu Anitele’a Tuilo’a.
O le palota tele o le tausaga e 2016 ma le 2021 na toe filifilia ai Faimalotoa e lona itumalo se’ia oo nei ina faasee tuāgalu mai le toe tauva i le filifiliga a Gagaifomauga Muamua.
