E to’atasi se talavou e sefululima tausaga le matua na mafai ona faasaoina lona ola, ina ua tafea i le vaitafe i Ngatiawa i le amataga o lenei vaiaso.
I lipoti e to’alua ni talavou na aga’i mai e toe foi i o la aiga mai se la tafaoga, e ala i le savali i le tasi o nofoaga ua ta’ua o le Kapakapanui Hut i le Tararua Forest Park, ae tula’i mai loa se faaletonu ina ua o la taumafai sopo’ia le isi ituvai ae see ai le tasi o talavou i le vaitafe.
Ta’ua e leoleo, sa maitauina le tetele o tafega mai timuga tetele na aafia ai lea faaitu ma o le ala foi lea na tula’i mai ai lea matāupu.
Na faafetaia e leoleo le vave o le mafaufau o le isi talavou i lona aga’i e sa’ili se fesoasoani, nai lo o le taumafai e lavea’i lana uo ua pa’ū i totonu o le vai, ona o le mala e ono tula’i mai pe ana ia taumafai e fesoasoani atu.
Ae i lipoti, sa mafai e le talavou na pa’ū i totonu o le vaitafe ona aau ma oo i le isi ituvai ma ia oomi ai le locator beacon o se tasi o tama’i masini faailoilo e fesoasoani e faasino tonu ai le vaipanoa o loo iai o ia, aemaise ia iloa e lana uo ma tagata o tau sa’ilia o ia.
Ua toe foi ma le manuia nei alii talavou i o la aiga ma o loo manuia uma i la’ua.
Ae o le faafetai sili e le’i iai se tasi na faamanu’alia pe fano foi se ola. Ua fautuaina foi e leoleo ma fesoasoani muamua ina ia tautuanā le saogalemu i le aga’i mo soo se savaliga aemaise o hikes i faaitu nei, ma ia mautinoa o loo lelei le tau i taimi e fuafua ai se tafaoga, ae ia mautinoa le iai o se locator beacon i taimi uma.
Puna o Faamatalaga: https://www.1news.co.nz/2025/05/19/teen-rescued-after-being-swept-into-swollen-river-north-of-wellington/
