Mapu ane ia i ou maota tapua’i ma laoa fetalai Samoa o le ao mamala. I le amata mai i le fale pogisa o le Tuimanu’a se’ia pā‘ia Mulifanua o le Alataua lea na itea ai Malo. Mapu foi i feaoga ma tanugamutia le susū o le Aufaigaluega Pa’ia a le Atua i le nofo fatoloa o le talalelei i le soo faataamilo o Samoa atoa.
Matou te faatulou atu ai tulou, tulouna lava le pa’ia o au faasausauga Samoa. Ae o le a fou nei le tofu o Aloaloolela e pei o le fetalaiga i le maota na tulutulu i tao ma faapitoaugafa so matou leo e faasilasila atu ai i suli moni uma o le suafa MAUGATAI i Vaiee Safata.
O le a faia la tatou feiloai’ga i le itula e 9 i le taeao o le Aso Toona’i, 18 Oketopa 2025 i le maota o lo tatou aiga i LAUPOLATASI i Vaiee Safata, se’i filimafua ma filitagaga la tatou tōfā ma le faautaga, ma filifili nisi ua tatau ai e nonofo i le suafa MAUGATAI e tausia lo tatou aiga. Fai mai se tasi o upu moni a Samoa, “Sama sē mago, tautai sē agavaa.”
E faamālūlū atu foi o le a lē avea lou lē auai mai ma ala e tolofia ai se faai’uga o le a tasi iai le faafitiga o ‘aleaga i le faigāfilifiliga a lo tatou aiga i lea aso.
Faamoemoe o le a tatou aulia atu ma le manuia lea aso ua taupoina, ma ia tatou maua se feiloai’ga manuia ma le fiafia e ala i le faatasi mai o lo tatou Tapa’au i le lagi.
Sainia: Suli moni uma o loo nonofo i le Aiga.
Post expires on 17 October, 2025