O le Aso Faraile lenei i Samoa ua mae’a ai le fitu aso e tatau ona faasalalau faalaua’itele ai moliaga o faatosina solitulafono e mafua mai i le faigāpaota tele ua mae’a, mai tagi e valu sa faaulu atu i le faamasinoga i le Aso Faraile ua mavae.
O nisi o ia matāupu ua taunuu mai mo le faailoaina lautele o tagi e tolu a sui sa tauva mo le patī faaupufai o le Faatuatua i le Atua Samoa ua Tasi o loo faasaga i sui na manumālō o le vaega faaupufai e Puipuia Aiā Tatau o Tagata mai itumalo o Faasaleleaga 2, Vaimauga 2, ma Faasaleleaga 3.
O le afioga Magele Sekati Fiaui sa seei i le nofoa o Faasaleleaga 2 ua ia molia le sui na manumālō le tofa Vaaelua Senetenari Samau i moliaga e 12 o gaioiga solitulafono sa ia faatino faatasi ai ma ni sui o lana komiti i le ave o tupe, mai le 150, 100 ma le 50 tālā i nisi o tagata palota ma le faamoemoe e tauanau ai le palota i le sui na manumālō.
E valu moliaga o le ave o tupe i nisi o tagata palota o lea itumalo ae 4 moliaga o le ave o taumafa, ma o moliaga uma ia ua ta’ua o bribery and treating.
I le tagi a le sui tauva sa seei i le nofoa o le itumalo o Faasaleleaga 3 le susuga Papalii Li’o Oloipola Ta’eu Masipa’u ua ia molia ai le sui na manumālō, le tofa Namulauulu Papalii Leota Sami Leota i moliaga e sefulu o faatosina solitulafono e ala i le ave o tupe mai le 100, 70, 50, 20 tālā i nisi o tagata palota ma moliaga e lua o le ave o tupe e 6 afe i le nuu o Tapueleele ma le isi 6 afe sa ave i le nuu o Fogāpoa.
I le tagi mai le itumalo o Vaimauga 2 ua molia ai e le sui sa tauva le afioga Tamalētā Taimang Jensen le sui na toe filifilia i le nofoa o lea itumalo le tofa Lenata’i Victor Faafoi Tamapua i moliaga o le ave o tupe mai le 400 tālā i le 40 tālā ma le faamoemoe e faatosina ai ia tagata e palota mo le sui na manumalo.
Ua molia foi e Tamalētā le sui faipule ua toe filifilia o Vaimauga 2 i le ave o se tanevai i se tasi o faalauiloa faapea ma le moliaga o le faamata’u e le sui na manumālō o nisi tagata palota ma folafola iai ni faasalaga pe a lē palota atu ia te ia.
O loo tālia le tuuina mai o faamatalaga au’ili’ili o moliaga o tagi e fā a sui o le vaega faaupufai e Puipuia Aiā Tatau o Tagata o loo molia ai sui na manumālō o le vaega faaupufai o le Faatuatua i le Atua Samoa ua Tasi.
E faapena foi i faamatalaga au’ili’ili o moliaga a le sui tauva tuto’atasi mai le itumalo o Falealili 2 faasaga i sui tauva na toe filifilia i le nofoa o lea itumalo le Minisita o Faatoaga ma Faiga faiva, le afioga Fuimaono Maiava Tito Asafo.
O le aso 15 o le masina fou o Oketopa le valaauga muamua o ia tagi uma e valu.
