I le faamavae ai o lē sa avea ma Komesina o le Matagaluega o leoleo, falepuipui ma le toe fuataina Fuiavailiili Egon Keil na fai ai se feiloaiga faamavae a le Matagaluega atoa ma le sa tulai mai le foe e faauluulu ai lea vaega taua o le Mālō.

I lea feiloaiga na fai ai le tamaitai Sui Komesina o Leoleo Papalii Monalisa Tiai Keti ma sui o le Matagaluega atoa e momoli le faafetai ia Fuiavailiili i lana tautua ia Samoa mo le 6 tausaga talu ona filifilia e avea ma Komesina. Taua e Papalii “Lau afioga e tapunia le isi faitotoa ae tatala le isi faitotoa e le Alii, talitonu e lē toe tau faamalaulauina le tele o galuega lelei sa e faatinoina no le Matagaluega ae momoli atu le agaga faafetai i mea uma lava sa e saunia aemaise le tapenaina o malu o le Mālō aua le tautuaina o Samoa”.

O le vaiaso nei e tusa ai ma se faaiuga a le Kapeneta o le a faasalalauina ai le avanoa mo le sailia o se Komesina fou a leoleo ma falepuipui. O Lea tofiga ua na’o leoleo ua umia le tulaga o Commissioner Officers e talosaga ai ma ua o latou ausia le 10 tausaga poo le sili atu o tautua i le galuega.

Ua avanoa ai foi ma i latou sa auauna faaleoleo ma taunuu i le umia o lea tulaga faaleoleo maualuga ona talosaga i Lea avanoa.