Ua faamaonia mai nei le faasala ai mo le 4 masina e le faamasinoga se tagata e puleaina se fale faigaluega mai Kalaiesitete; ina ua faamaonia moliaga e 2 o lea tagata i lona faia o ni faamatalaga ma faamaumauga lē sa’o ma le taufaasese i le Ofisa o Femalagaa’iga – Immigration New Zealand ma le moliaga e 1 o lona fesoasoani i se isi tagata e faia pe faaosoosoina e faia se soligatulafono i visa (aiding and abetting the breach of visa conditions).

E tusa ai ma se pepa o faamatalaga mai le Ofisa o Femalagaa’iga ia Niu Sila, na faamanino ai e le ofisa, o lē ua molia o le tama’ita’i ia Ava Young na ia aumaia se tama’ita’i Thailand i totonu o le atunuu e faaaogā ai se visa tafao pe asiasi mai i le atunuu poo le visitor’s visa.

Ua faamauina na pelogia e Ava le ofisa e ala i le pepa talosaga o visa, e faapea e iai ona sootaga faaleaiga i le tama’ita’i Thailand.

Peita’i, e le’i sa’o ma faamaoni ia faamaumauga, e faamauina e leai ma se sootaga o nei tagata pe iloa e le tama’ita’i Thailand Ava mai lava i le ulua’i taimi na ‘ofa atu ai e lē ua molia poo Ava se galuega mo ia i Niu Sila. 

Ta’ua foi, e 150,000THB tupe Thailand le tau aofa’i o le galuega faatasi ai ma le faatino ai o le talosaga mo le visa na totogi e le tagata Thai i lē ua molia pe tusa lea ma le $7,5000 tālā Niu Sila, ma le faaupuga o le tupe o loo aitalafu ai le tagata Thailand ia Ava mo le faatinoina o vaega.

Ina ua taunuu mai i Niu Sila i le tausaga na te’a nei 2024 si mafine o loo aafia; ae faailoa atu e Ava Young o ia o le a nofo ma galue i totonu o le atunuu.

Na amata ai loa gaioiga a Ava, e pu’e le ata o le tama’ita’i Thailand ae faasalalau loa galuega e mafai ona fai e lea mafine.

O iinā na amata feagai ai loa sia tama’ita’i Thailand ma faatinoga lē manuia a Ava, o le aga’i atu o tagata e totogi seleni ae faatino iai ni aga lē tau tamālii – poo faigāaiga se’i tulou.

Ua faamanino mai, na faatino e le tama’ita’i Thailand vaega uma e tusa ai ma faatonuga a Ava Young ma le faamoemoee toe totogi uma atu e lē ua aafia tupe na faaalu e Ava i le aumai ai o ia i totonu o le atunuu. 

Na māua e le ofisa faiga faalēalofa ma soligatulafono a Ava, ina ua oo atu ni faaseā i le lē savalia ai o aiaiga i le iai o le tama’ita’i Thailand, o tuutuuga o le visa na malaga mai ai ma faafitauli o loo fetaia’i ma le tama’ita’i Thailand.

Ma i iloiloga o lenei matāupu, na faatino ni sa’ili’iliga ma osofa’iga e faaaogā ai le oo atu i le 6 o pepa faataga poo search warrants i le tele o nofoaga a le tama’ita’i o Ava Young i Aukilani ma Kalaiesitete ma saisai ai loa lē ua molia nei.

E tusa ai ma le faasalaga o Ava Young, ua faasala nei o ia i le 4 masina e nofo vaavaaia ai i le fale poo le home detention ina ua ia ioe i ona moliaga.

Puna o Faamatalaga: https://www.immigration.govt.nz/about-us/news-centre/christchurch-employer-sentenced-for-immigration-offences