E oo atu i le $36,900 le faasalaga tupe ua faasala ai nei ni alii faifaiva se to’atolu ma se isi alii i le faatau atu o le faitau afe o figota i le maketi (black market) e aunoa ma se faatagaga i lalo o le tulafono.
O alii faifaiva e to’atolu o Michael Noel Hawke e 61 tausaga, o Stuart Teiwi Ryan e 48 tausaga ma Peter George Fletcher e 32 tausaga le matutua, na tūtūla’i i luma o le Faamasinoga Faaitumalo i Invercargill, na ioe uma i o latou moliaga i lalo o le tulafono o faigāfaiva – Fisheries Act.
O le tasi o alii e to’afā ai i latou e igoa ia Duncan William Davis e 39 tausaga le matua, na molia i moliaga e lua o le faatauina atu o le tele o tuitui ma le tele o pāua ma le i’a e ta’ua o le blue cod.
O lenei matāupu, e faamauina sa amata su’esu’e mai le tausaga 2023 ina ua alia’e ma fesiligia e nisi o sui o le faigāfaiva tulaga o faamaumauga ma gaioiga a nei alii, ma nisi o tagata o loo sapalai ma faatau atu iai e i latou nei figota.
Na faailoa e le faatonu o faigāfaiva faaitumalo ia Greg Forbes, e leai ma se tasi o nei alii faifaiva o iai se pemita e mafai ai ona fagotaina se i’a e mai atigi poo shellfish.
Faamauina o le alii o Davis e maualuga ai lava lona faasalaga i le to’afā, talu ai o ia e lē o se tagata faifaiva ua laiseneina e na te fagota ni figota mo le faatau atu poo se commercial fisherman.
Mai le faasalaga tupe e $36,900 e $14,000 lana sala ona o lona faatau atu faasolitulafono o le oo atu i le 400 o pusa tuitui; ma i faamaumauga e oo atu i le $5000 le tau aofa’i o nei figota ma le $2000 le tau aofai o i’a na ia fagotaina.
O Hawke, e $6,000 lana sala, ina ua faamaonia lona faatau atu o le 1000 o dredged oysters i le tausaga 2023. Faamaonia e silia ma le $3000 le tauaofai o ia figota i le maketi. Faamanino e le ofisa o faigāfaiva, e ui na iai le faatagaga e na te fagotaina ai lea figota mo le tausamiina ae le’i iai se faatagaga i lana laisene ma le pemita e na te faatauina atu oysters i le maketi pe sapalai foi.
O le alii o Ryan, e ta’ua ua faasala i le $13,000 i lona faatau atu o ula sami e 114 ma le lata i le 40 o le i’a o le blue cod, ma maua ai le tino i tupe e $2,250.
A o le alii o Fletcher, ua faasala nei i le $3,900 i lona faatau atu o dredge oysters, ma i faamaumauga o loo ta’ua ai e tele taimi na ia faia ai lenei gaioiga.
Ua faailoa e le ofisa o faigāfaiva le telē o lenei faafitauli, ma i le latou vaai, e telē le aafiaga o gaioiga a tagata e faia nei tulaga ona o le a afaina ai le galuega faasao ma le galuega o loo taumafai ina ia malupuipuia lelei figota mo le lumana’i.
Puna o Faamatalaga: https://www.odt.co.nz/southland/four-men-fined-total-36900-illegal-sale-seafood
