Ua faasala nei e le faamasinoga le tamaitai o Julie Pearl De Los Santos, i lona faia ai o ni gaioiga tau fa’avalea ma le taufaasesē.
I ripoti mai le Stuff na faamauina ai o lenei tamaitai na pelogia le toatele, e ala i lona faailoa i tagata o ia se faufautua i mataupu tau femalagaiga, peita’i e le moni, ma na faatino ia gaioiga e aunoa ma se laisene faaletulafono.
Ta’ua, e toa lima ni tagata Filipino na ia ‘ofa iai ni galuega ma le faamoemoe e faatino ai ma o latou pepa malaga mo Aotearoa nei.
Ae i le faatino ai o lenei galuega, e tatau i latou nei ona totogi atu ia te ia le oo atu i le $11,000 mo le tagata e toatasi.
Ma le lē iloa e i latou o lea na tuufaatasia e lenei tamaitai pepa e lē moni ma lē sa’o.
Māua i ripoti, na faaaoga e lē ua molia, le visa o le vaitaimi o le afā o Gabrielle i le tausaga 2023. Na tuufaatasia e Julie Pearl De Los Santos ni pepa ma ni galuega lē taualoa e taumafai ina ia maua ai le visa ua ta’ua o le Cyclone Recovery visas faaaoga ai faamaumauga o nisi o tagata inisinia e aunoa ma se faatagaga.
Talu ai le lē sa’o ma le lē tonu o gaioiga a le tamaitai ia Julie, na faailo e le faamasino na nafa ma le iloiloina o lea mataupu, ua fai lava sina lē alofa o lea tamaitai ma lona faia o lenei gaioiga i nai tagata o loo taumafai e saili ni manuia i totonu o Niu Sila. Sa talitonuina e i latou nei Julie, ma le faamoemoe o le a maua ni o latou galuega faapea pepa malaga e tusa ai ma visa, peitai ua olegia e lenei tamaitai taumafaiga ma le tautīga a nai tagata Filipaina o ē ua aafia i lenei mataupu.
Ma ua molia ai nei le tamaitai o Julie Pearl De Los Santos mo le 7 masina e nofo vaavaaia ai i lona fale- poo le vaega ua ta’ua o le home detention, ma ua faatonuina o ia e totogi le $25,000 talā Niu Sila i totonu o le 3 masina.
Faamauina le iloilo ai e le Ofisa o Femalagaiga a Niu Sila tulaga o le iai o lē ua molia i le atunuu, ma i ripoti e telē lava le avanoa e faalēaogaina ai lona visa ma toe tipoti i Filipaina. I le taunuuga foi o lenei mataupu, ua faalēaogaina ai e le faamasinoga pepa aloaia e toe faatino ai ni galuega a lea tamaitai faapea ona lē toe faatautaia ai lana kamupani i lalo o le tulafono.
I ripoti, talu ona tulai mai lenei mataupu, ua mafai ona maua visa o le Migrant Exploitation Protection Visas mo le i latou na aafia i nei ituaiga mataupu.
Puna o Faamatalaga: https://www.stuff.co.nz/nz-news/360746866/shattered-dreams-unlicensed-immigration-advisor-who-abused-system
