Ua faasala e le Faamasinoga Maualuga i le tasi le tausaga ma masina e fitu le taule’ale’a o Lyndon BJ Ianuari, ina ua faamaonia lona ioeina o le solitulafono o le faaoolima ma le faaoomanu’a tugā i se tama’ita’i o lona to’alua, ae tupu le solitulafono o loo nofo eseese.
O se tasi lea o matāupu tau sauāga i totonu o aiga ua oo i le faamasinoga e mafua i le lē fiafia o lē ua nofosala, i le alu o lē na aafia i le fale kalapu o le 75 ma tafao ai, lea sa ia tagofia ai le ‘avamalosi.
O le lē fiafia o Lyndon i lea tulaga sa ia alu i le aiga o lona to’alua ma faamasino le tama’ita’i ma i’u ai loa i lona umia o se aupega e faapea mai leoleo o se meafaigaluega ma’ai e faaaogā e tipi ai pusa poo se box cutter.
O le ma’ai tele o le vaega o lea mea faigaluega na ogaoga ai se manu’a i le tua ma le tau’au o lē na aafia ma ave ai i le falema’i mo togafitiga.
O lē ua nofosala sa tausi e se tasi o lona aiga i Amerika Samoa ma a’oga ai se’ia oo ina taunuu i le Community College.
Sa faigaluega i le faletupe o atina’e i Amerika Samoa ae na toe foi mai i Samoa i lona aiga i Leonē ma nofo ai.
O lona faasalaga e tausaga ma masina e fitu ua toesea ai le taimi sa nofo taofia ai i le vaaiga a leoleo a o faagasolo su’esu’ega i lona moliaga.
