Ua tuuina atu nei se faasalaga tupe i se alii i le lavea ai o se vaalele e faapea na ia fausia.
Ma e ta’ua, e fai o le lē saogalemū ae e leai foi se laisene e faataga ai ona faafoe e lea alii le vaalele.
I lipoti, i le tuuina mai o le i’uga a le Faamasinoga Faaitumalo a Marton na o latou poloa’ia ai ina ia totogi atu e lea alii le $14,475 i le solia ai o aiaiga ogaoga i tulaga o tulafono tau vaalele e feoa’i i le ‘ea.
O lea vaalele na lele ane mai Fielding ma lavea ai i se malae e lata i Marton ma sa tigāina ona manu’aga ma sa telē se faaleagaina o le vaalele.
Fai mai le faamasinoga o le fai lelei o toleniga ma a’oa’oga talafeagai mo le faafoeina o le vaalele, ina ia faamautinoaina o loo saogalemū le vaalele ma ia iai tusipasi e fealua’i ai ma o loo laiseneina foi, o nisi ia o vaega tāua e ao ona iai.
Ta’ua ai e le Pulega o Vaalele Sivili Civil Aviation Authority, e matua’i lē saogalemū lava gaioiga a lē ua faasalaina, ma e le’i mafaufau lea alii i le saogalemū o tagata lautele.
Puna o Faamatalaga: https://www.rnz.co.nz/news/national/568012/man-fined-after-crashing-unsafe-plane-that-didn-t-have-a-licence
