E 18 masina ua tapu pe faasā ai e le faamasinoga i sana faai’uga le toe umia e Alesana Kuresa o Siumu o se laisene ave taavale, ae ua amata tuli lona faasalaga e 14 masina i le falepuipui ina ua faamaonia lona moliaga o le ave taavale faatamala na mafua ai ona fano le ola o se teineititi a’oga 6 tausaga le matua.
O le masina o Mati o le tausaga e 2023 sa faafoe ai e Alesana se pikiapu Hilux ma sa malaga atu ai mai Siumu aga’i i Mulivai Safata.
O le taimi sa malaga ai na fetaui ma le tuua o fanau a le a’oga tulagalua a Mulivai Safata.
O lē na aafia sa taumafi e sopoia le isi itu o le alatele ae taia ai i le taavale sa faafoe e lē ua nofosala i le falepuipui.
Faaalia e lē ua molia i leoleo sa tu i le taimi o le faalavelave ma taumafai e fesoasoani peitai sa toe faaauau ona alu lana pikiapu ina ua ia vaaia o tamo’e atu se taule’ale’a.
E 3 tausaga sa amata ai le fua o se faasalaga i le falepuipui peitai o itu lelei faasino ia Alesana e pei o le ifoga ma le faatoesega i le aiga o lē na maliu i le faalavelave, o lona sao sa fesoasoani ai i le lau’ava ma lona ioe vave i le moliaga, na toesea ai isi masina ma totoe mai ai le tausaga ma masina e lua ua nofosala ai nei.
