E 12 molimau a leoleo ua amata su’esu’e i le Faamasinoga Maualuga i lenei vaiaso e lagolago ai moliaga o loo tuua’ia ai lē sa avea ma faia’oga o le ‘aulakapi o le Manu Samoa le afioga Mase Mahonri Schwalger.
Peita’i o loo iai le tapu a le Faamasinoga Maualuga na tuuina mai i le masina o Aperila ua faasā ai ona faasalalau soo se faamatalaga mai taualumaga o lea faamasinoga se’ia vaganā ua maea ona su’esu’e molimau ma taunuu le faamasinoga i sana faai’uga.
O lea tapu na faailoa ai e le afioga i le Faamasino sinia le afioga Vui Clarence Nelson, ua sauni e tuuina atu soo se tasi i le falepuipui e lē usita’ia lea faatonuga.
E faasino foi lea finagalo o le Faamasino sinia i tagata latou te faasalalauinaa ni faamatalaga o lea faamasinoga i auala o fesoota’iga televavave le social media.
O loo molia lē sa avea ma faia’oga o le Manu Samoa i ni tuua’iga tau faiaiga solitulafono, le taumafai e faatino se sootaga tau faiaiga, le faaoolima matagā ma le faaoolima i se tama’ita’i e i lalo ifo o le 16 tausaga le matua.
O loo teena uma e Mase ia moliaga a leoleo, ma o le vaiaso atoa lenei o loo su’esu’e ai molimau a leoleo.
