O tapenaga a vaega faaupufai ua sauni e finauina e o latou sui faatutu tofi faipule o nofoa o itumalo faapalota e 51 o le atunuu, ua molimauina le faaopoopo pea o sui tauva tamaitai ua momoli i nisi o vaega faaupufai e pei o le Faatuatua i le Atua Samoa ua Tasi.
O lea ua momoli le sui tauva tamaitai mo le tofi faaolioli o le itumalo o le Vaimauga 4 o le afioga Tonuu Fuamoli Amituanai Misi.
Sa seei i le tofi o Vaimauga 4 le afioga Faualo Jeffrey Harry Schuster.
O le tasi o sui tauva tamaitai ua momoli foi i lea vaega faaupufai o le afioga Toomata Nora Leota o le a finau mo le nofoa o le itumalo faapalota o Anoamaa 2 lea sa tulai mai ai le tofa Lauofo Fonotoe Nuafesili Pierre Meredith o se sui o le vaega e puipuia aiātatau a tagata.
O le faalua lea ona tauva le afioga Toomata Nora Leota i le tofi o lona itumalo.
O le itumalo o Safata 1 lea sa tula’i mai ai le afioga Leaana Ronnie Posini o le sui o le vaega faaupufai e puipuia aiātatau a tagata, o le a tauva ai le sui faaolioli o le Faatuatua i le Atua Samoa ua Tasi o se isi foi tina ua mae’a momoli i le pati faaupufai, le afioga Anapu Seve Te’i Fuimaono.
E lē fou le taaloga o upufai i le afioga Anapu auā sa avea muamua ma faipule o le Palemene i le mae’a o le palota tele o le tausaga e 2006.
Sa avea ai o ia ma sui faipule a o lua nofoa o le itumalo o Falealili, lea sa seei ai i le suafa Fuimaono Na’oia Te’i.
