Ua faaalia nei le lē fiafia o se tinā mai Kalaiesitete, ina ua ia maua tala ua atoa nei le 6 o aso o taofia lana tama tama e 15 tausaga le matua, i le sela a leoleo i lo latou ofisa.
Faamatala e lenei tinā, ua tele lava aafiaga ua tula’i mai i lona atalii talu ai nei faiga, ua faateteleina le ma’i o lana tama e faaigoaina o le ADHD.
Ma talu ai lea faafitauli, na oo lava i o’o’oga o le toe faaoo lava ia te ia o manu’aga ona o aafiaga o le mafaufau e feagai ma lea talavou.
O le leaga o le aso muamua lava na tupu ai lea faalavelave.
I lipoti, o lenei talavou, ua tele matāupu solitulafono ua aafia ai, ma o lea na taofia e leoleo i le talepe fale, ma sa taofia i le ofisa, ona ua leai se avanoa i fale a le Oranga Tamariki, e pei ona silafia e avatu iai tupulaga talavou pe a aafia i le tulafono.
Faaalia e le tinā e le’i faafesoota’i atu o ia pe vili atu se isi i le tulaga na aafia ai lona atalii ma o lona lē fiafia e leai ma se agaga alofa mo si ana tama ma le lē faatino ai e leoleo o le galuega o le faafesoota’i o se fesoasoani mo ma’i e iai aafiaga o le mafaufau, e tusa lava poo aafia lona atalii i matāupu tau soligatulafono.
Ta’ua e le Komesina o loo nafa ma matāupu tau fanau ma tupulaga talavou – Children’s Commissioner Dr Claire Achmad, sa lē tatau lava ona tupu lea faafitauli.
E lē tatau lava ona taofia ni fanau i totonu o sela talu ai o nei si’osi’omaga e ua faatulaga mo tagata matutua, ma afai ae tuu iai fanau e ono telē lava le aafiaga i le soifua mālōlōina o le tamaitiiti poo le talavou, e lē gata i tino, o lagona aemaise le mafaufau.
Puna o Faamatalaga: https://www.rnz.co.nz/news/national/570462/more-young-people-being-detained-in-police-cells-for-longer-children-s-commissioner
