Ua faamaonia mai e le Matagaluega o Soifua Mālōlōina e to’a 618 i latou fou ua pesia i le siama o le Koviti-19 mai le 2:00 i le aoauli o le aso 28 Aperila 2022 e oo atu i le 2:00 i le aoauli o le aso 02 Me 2022 ma ua siitia ai i le 10,210 le aofai atoa o le mamalu lautele o le atunuu ma i latou na malaga mai fafo ua pesia i le siama o le Koviti-19.
I lea to’a 618, o le 615 e mai le mamalu o le atunuu lautele a’o le isi to’atolu na malaga mai fafo, e to’a 14 i latou o loo faanofoesea i nofoaga faapitoa i le falema’i i Motootua.
Ua faaopoopo nei le tagata e to’atasi ua fano le soifua ona o le koviti ma ua oo atu ai le aofai o i latou ua maliliu i le to’a 20. O lē ua maliu o se tinā e 91 tausaga le matua o le soifua, o loo iai ona gasegase tumau ae ua o faatasi ma le siama o le faama’i ma e leai sona tuipuipui na faia. Talu ai ona o le faaaloalo ma amanaia faalogona o tauaiga ma fanau o le tinā ua maliu, o le a leai ai se isi faamatalaga faaopoopo e tuuina atu i le tatou Malo.
O loo faaauau pea le tuu atu o fautuaga a le Matagaluega o Soifua Maloloina i le mamalu o le atunuu ina ia tausisi pea i tulafono mo puipuiga mai le faama’i auā lava le saogalemu mai le ono aafia i le saima e ala i le fai o tuipuipui, manatua le tu vāvā ese mai isi tagata ma le faia lea o punifofoga.
