Ua faamaonia mai nei e le Minisita Lagolago o le Matāgaluega o Fela’ua’iga ia James Meager le faaopoopo atu ai o le 76.7 miliona tālā Niu Sila mo galuega faatino a fesoasoani muamua – o i latou e nafa ma le matāfaioi o le sa’iliga o tagata e leiloloa, i lona faaperetania, Serach & Rescue a le atunuu.
Faamanino e le alii minisita lagolago, o lea tino i tupe o le a mafai lea ona fesoasoani i faalapotopotoga e 12 o loo fītāituga i le faatinoina o lea galuega tāua i le atunuu ina ia mautinoa le mafai ai ona faataunuu galuega i aso ta’itasi.
Faaalia foi le faaopoopo atu ai e le malo o sa latou fesoasoani e pei ona faalauiloa mo lenei kuata e $624,000, mo le sini lava e tasi, e faamoemoe ina ia saga faatumauina ai le lelei ma le alualu i luma o galuega faatino a fesoasoani muamua.
Ta’ua e James, e tele lu’itau e fetaia’i ma Niu Sila, ona o lea le itu, e fai lava sina tetelē o laufanua, o vaitafe faapea le sami.
Ma ona o ia tulaga e maualuga ma toe tele faafitauli ma lu’itau e feagai i le tau sa’ilia o se tagata e leiloa mai.
O le ala foi lea i lona iloa, e tatau ona telē se fesoasoani e avatu i faalapotopotoga o le Search & Rescue.
Ia mautinoa le saogalemu o tagata lautele i soo se taimi lava o le aso.
I faamaumauga e tusa ai ma le pepa o faamatalaga mai le Palemene, na faaalia ai i le tausaga na te’a nei, e 152 soifua na faasaoina, e 921 na aga’i atu iai le fesoasoni ma le 794 o tagata na sa’ili ma maua e tauala mai i galuega faatino a le Search & Rescue.
O se vaega na faafetaia ai le oo atu i le 11,000 o tagata o loo galulue i lenei auaunaga, e pei ona faamanino foi o le 80% o i latou nei o tagata o loo ofoina atu lo latou tau’au fesoasoani e aunoa ma se totogi poo volunteers.
O auaunaga o loo aofia i galuega faatino o le sa’ilia o tagata, e aofia ai le Land Search & Rescue New Zealand, Coastguard New Zealand ma le New Zealand Police.
Puna o Faamatalaga: https://www.beehive.govt.nz/release/lifesaving-funding-boosts-kiwis-outdoor-safety
