O sui o komiti a Fono Faavae o itumalo e tolu e aofia ai Sagaga 1, Vaimauga 2, i le motu o Upolu ma Faasaleleaga 3 i Savaii, ua maua ai nei le aofa’iga e 33 o itumalo faapalota ua faamautū sainigalima ma le malo mo le faamatuuina iai o vaegatupe o le tufatufaga o le miliona lona 3.
O le Aso Lua o lenei vaiaso na faamautū ai sainigalima a ia itumalo e ala i sui o a latou komiti o Fono Faavae.
O le tufatufaga muamua e maua ai le $700 afe tala ua aofia ai le vaegatupe e $160 afe tala mo le faatupeina o galuega o le ofisa tutotonu ma alauni faapea totogi o le komiti ma le aufaigaluega.
O le 540,000 afe e faaaogā i poloketi ua faamautū mo le manuia o tagata o itumalo.
E faato’ā faamatuu le vaegatupe e 300 afe e atoa ai le tasi le miliona pe a mae’a pasia lipoti o le faaaogāina o seleni ma le lipoti o le su’eina o tupe.
O loo totoe nei itumalo faapalota e 19 e le’i sainia maliega mo le miliona lona tolu a o lumana’i ai le faai’uga o le masina fou o Iuni e mae’a ai le tausaga faaletupe o loo faagasolo lea ua aiaia ai vaegatupe mo le tufatufaga o le miliona lona 3 mo itumalo faapalota e 51 o le atunuu.
