O le fagufagu e gaosia mai le ofe ae faaaogā le puisu se’i tulou e ili ai, o le toe faaolaola o le filiina o le ‘afa, gaosia o siapo, fauina o le pa alo atu, ma le tāina o le paopao e faapitoa lava i le tāina o le palolo, o nisi ia o galuega o le a toe faaolaola i se fesoasoani a le UNESCO o se faalapotopotoga a Malo Aufaatasi, e una’ia a’oa’oga ma tomai i talatuu ma aganuu, ae o le a faatino e le nofoaga tutotonu o le Tiapapata Arts Center.
O le a faagasolo se a’oa’oga mai le masina nei o Setema se’ia oo ia Novema o lenei tausaga e faia i le Tiapapata Arts Center o le a toe fafagu ai ia vaega tāua o le tu ma aganuu faasamoa auā ua faaalia i se pepa o faamatalaga, o nisi ia o vaega tāua e ao ona toe faaolaola ona ua mou atu.
E pei ona silafia o taumafaiga a le afioga Galumalemana Steve Percival o le pule faatonu o le nofoaga o le Tiapapata Arts Center ua mafai ona toe fausia ai to’i maa o nisi o a tatou meafaigaluega sa faaaogā i aso anamua.
Ua taumafai foi lea tamālii e toe fafagu mai le gaosiga o le lama e faaaogā ia tatou faatufugaga o le tāina o le tatau ma le malu lea ua tele ina faaaogā le lama e maua mai i le susunuina o le kalasini e lē saogalemu.
