O le asō, Aso Lulu, 25 Iuni 2025 lea ua aumai ai le faai’uga a le tamaitai faamasino o le Faamasinoga Faaitumalo, Talasa Atoa-Saaga, ina ia faamuta loa le toe faaauauina o molimau o le faamasinoga sa faagasolo i moliaga o i latou e to’aono o loo molia i faufauga ma le faaseseina o molimau o le faamasinoga, e pei ona sa faatulaga mo le lima vaiaso e faagasolo ai.
E le’i uma ona faagasolo le silia ma le fitusefulu o molimau a le itu tagi poo le itu a leoleo na mua’i faailoa ua faatulaga, ae o lea ua aumai le faai’uga a le tamaitai faamasino, ua faagata ai i le asō le valaauga o molimau a le itu a leoleo.
Mo le itu tetee, na faailoa e latou loia e leai se isi o latou o loo molia o le a tula’i e fai se molimau, ma e le’i teena e le loia mo leoleo lena mau a le itu tetee, ma sau ai loa ma le faai’uga a le faamasino, ua faamuta ai loa i le asō lenei faamasinoga, ae o le a faatali le faiga o folasaga faai’u a loia, o le a fai i se aso o le masina o Oketopa a o le’i aumai le i’uga o lenei faamasinoga ua leva ona faatalitalia e le atunuu.
O le asō sa faatulaga ai nisi molimau se to’alua a le itu a leoleo e fai mai atunuu i fafo e faaaogā ai fesoota’iga i luga o le zoom, peita’i e pei ona ta’ua mai lipoti i Samoa, e na o le to’atasi le molimau o le to’alua lena na mafai ona faatino mai.
E tusa ma le lipoti mai Samoa a le sui o le Radio Samoa i lenei faamasinoga, pe tusa ma le luasefulu ma ona tupu isi molimau a leoleo ua le’i faaaogāina, ae o le faai’uga lea ua i’u iai lenei faamasinoga mo le taimi nei.
