I le 6 masina o iai Samoa i lapata’iga ma fautuaga sa togafitia ai le pepesi o le faama’i o le tale vivini poo le whooping cough o lea ua faamuta aloa’ia.
O Novema o le tausaga na te’a nei na amata faamalosia ai lapata’iga ma fautuaga mo le puipuia o le atunuu mai lea faama’i pipisi e pei ona faamauina e 427 le aofa’iga o tagata na aafia ma masalomia i āuga o le tale vivini, peita’i o le 3 masina talu ai sa mātauina ai le faaitiitia o tagata na aafia ma o se tulaga lelei lea i le galuega sa faatino e le auaunaga faasoifua mālōlōina.
Ua faafetai ai le matāgaluega i le lagolago a le atunuu aoao a o taumafai lana auaunaga e momoli i le atunuu faamatalaga e puipuia ai le soifua o tagata mai lea faama’i.
