Ua faailoa aloa’ia nei le maopoopoga ua iai le mafutaga a se vaega to’atele o sui tauva tuto’atasi ua galulue faatasi i tapenaga o le palota tele, aemaise i le taimi e mae’a ai le faigā filifiliga a le atunuu aoao, i se faigāmalo fou o le a tula’i mai.
E 15 sui tauva tuto’atasi sa auai i le faalauiloaina o lea mafutaga ae lē o se vaega faaupufai.
O nisi o i latou o le taimi muamua ua tauva ai i faigāpalota a le atunuu e sa’ili ai sui usufono o le Palemene, o nisi foi sa tauva muamua faatuto’atasi a o nisi sa tauva i fu’a a nisi o patī faaupufai e pei o le Tautua Samoa ma le vaega e puipuia aiā tatau a tagata peita’i e le’i manuia.
O isi sui tauva tuto’atasi i le mafutaga lea sa avea ma faipule i paea’iga ua mavae a le Palemene ma sa avea ma sui o le vaega faaupufai e puipuia aiā tatau a tagata e pei o le afioga Sala Vaimili II sa tauaveina le tofi minisita o le Kapeneta, ma le afioga Valu Matai’a Nafo’itoa Talaimanu Keti sa avea ma Sui Fofoga Fetalai.
O finagalo o sui tauva tuto’atasi sa avea ma faipule o le Palemene i paea’iga ua mavae sa lagolago i le patī faaupufai e puipuia aiā tatau a tagata, afioga Salā Vaimili II ma le afioga Valu Matai’a Nafo’itoa Talaimanu Keti.
O le sui tauva tuto’atasi mo le itumalo o Aiga i le Tai, susuga Leiataualesā Jerry Brunt o le ta’ita’ifono o le mafutaga a sui tauva tuto’atasi sa ia folasia le autū ua galulue faatasi ai.
Le ta’ita’ifono o le mafutaga a se vaega o sui tauva tuto’atasi, susuga Leiataualesā Jerry Brunt.
O le feiloa’iga muamua ma le ta’ita’ifono i se vaiaso e le’i mamao atu sa ia faailoa ai e 32 sui tauva tuto’atasi o loo i totonu o le latou mafutaga.
E le’i auai nisi o sui tauva tuto’atasi i le faalauiloaina o le latou mafutaga tuu faatasi ona o nisi o tuatuagia tāua.
