E le’i nofoa’i le faigāmalo fou i le tuana’i o ni itula talu ona mae’a faatauto le paea’iga fou lona 18 a le Palemene ma faatauto ai foi le Palemia ma Minisita o le Kapeneta, i le tapena loa o se fuafuaga tau tupe faanatinati auā totogi o tagata faigaluega a le malo ma isi galuega o loo mana’omia vave ai seleni.
E pei ona silafia ua māfua lea tulaga ona e lē o iai se tala o le tupe masani faaletausaga ona sa teena le fuafuaga o le tala o le tupe a le faigāmalo ua mae’a lo latou taimi.
O le ulua’i feiloa’iga a tusitala ma le aufaasalalau i le Aso Lua ananafi i Samoa ma le afioga i le Palemia, susuga Laaulialemalietoa Leuatea Polataivao Fosi Schmidt na ia faailoa ai o le asō le Aso Lulu i lo tatou atunuu e pasia ai se fuafuaga tau tupe faanatinati poo se emergency budget.
Le afioga i le Palemia o le faigāmalo filifilia ua amata lana nofoaiga, susuga Laaulialemalietoa Leuatea Polataivao Fosi Schmidt.
