Ua faailoa ai nei e le malo le faamautū ai o se nonogatupe e tusa ma le 4 tesimale 3 miliona tālā Ausetalia mai le Faletupe o Atina’e a Asia le Asian Development Bank e fesoasoani e siitia ai le malosi’aga faafouina e ala i le eletise e maua mai le malosi o le la, lea e faaaogā le apaiila ua ta’ua o solar panels.
O lea faletupe ma le kamupani o le Sun Pacific Energy Limited ua sainia lea nonogatupe mo le fausia o nisi nofoaga e faatutū ai apaiila o solar panels e maua ai le eletise, o se taumafaiga na muamua faatupe e le Faletupe o Atina’e a Asia mo Samoa i le tausaga e 2017.
Ua faailoa i se pepa o faamatalaga o le faalauteleina o nofoaga e maua ai le eletise mai lea malosi’aga faafouina o le a mafai ona maua ai le eletise e tusa ma le 9 tesimale 6 gigawatts (kikauati) ae faaitiitia ai i le 1,944 kasa eleelea lea e ta’ua o kasa kaponi e pua’ina atu i fafo ma aafia ai le si’osi’omaga o le ea ma le vanimonimo.
O le kamupani o le Sun Pacific Energy o se ulua’i kamupani tuma’oti i Samoa ua mae’a sainia sana maliega ma le faalapotopotoga o le malosi tau eletise poo le EPC mo le 20 tausaga, e mafai ai ona faagaioia e le kamupani malosi’aga faafouina mai le la mo le mauaina o le eletise.
E iai le talitonuga o le toe faalauteleina o le tautua a lea kamupani o le a mafai ona fo’ia ai le faafitauli o le maualalo o le eletise maua i le motu o Upolu ae ua saoasaoa le tulaga mana’omia.
O le tausaga e 2023 na feagai ai le malo ma lea tulaga e pei ona tula’i mai faaletonu i le eletise i le tausaga nei ma faatino ai le faasoasoa o lea auaunaga i Upolu i le masina o Mati ina ua aliali ni faaletonu e lē gata o nisi o afi suāuu o loo gaosia ai le eletise a o uaea malolosi i lalo o le palapala.
O le masina fou lea ua faatulaga e taunuu ai afi eletise tetele e lua o le a faaopoopo i le auaunaga a le malosi tau eletise i Upolu, a o faaaogā ai i le taimi nei i se tulaga lisi ni afi suāuu se fā e maua ai le eletise.
