Ua mausalī le maliega tau fefaataua’iga tele a Niu Sila ma atunuu e ono i Sasae Tutotonu, poo atunuu nei a le Gulf Cooperation Council.
O le maliega lenei o le a leai ai se tiute e totogia mo le 99% o oloa e auina atu i fafo a Niu Sila i le umi e silia ma le 10 tausaga.
Ua sau ai i le mae’a sainia o le maliega o fefaataua’iga sa’oloto a Niu Sila ma le United Arab Emirates i le masina o Setema.
Mai le tausaga e 2007 i le 2009 na amata faatalanoa ma faauma ai feutana’iga o le maliega lenei peitai e le’i sainia ona o nisi o suiga o ta’iala o maliega tau fefaataua’iga i Sasae Tutotonu, se’ia oo mai ai i e 2022 lea na toe lalaga mai ai i luga.
O le maliega ua sainia ma faamautū i Qatar lea o loo iai le minisita o fefaataua’iga Todd McClay i le vaiaso nei, e faatusaina lea e silia ma le $3 miliona i le tausaga, ma o loo iai i totonu le $2.6 piliona o oloa faatau atu i fafo a Niu Sila.
O atunuu i Sasae Tutotonu o loo iai i le maliega sa’oloto ua sainia nei, o Bahrain, Kuwait, Oman, Qatar, Saudi Arabia ma le United Arab Emirates ma o lea faato’ā tali taumafaiga ua lata i le 20 tausaga o taumafai mai.
O le ulua’i taimi lenei ua ausia ai se maliega tau fefaataua’iga a atunuu nei e ono i Sasae Tutotonu ma se atunuu mai le tatou itulagi.
Puna o Faamatalaga: Gulf nations trade deal struck after almost two decades | RNZ News
