Ua faailoa nei e le ta’ita’i o le Malo le afioga i le tamaitai Palemia le auai uma o sui o malo e 56 o le lalolagi o loo avea ma sui o Malo o le Taupulega, i le fonotaga o le a usuia i Samoa i le masina fou o Oketopa.

O ia atunuu ua aofia ai Malo e tolu e iai o latou Tupu, e pei o Peletania tele, o le Tupu o le atunuu o Brunei, ma le Tupu o le Malo o Eswatini o se atunuu i le konetineta tele o Aferika.

O le feiloa’iga a tusitala ma le tamaitai Palemia o le ta’ita’ifono foi o le komiti tele a le Malo o loo feagai ma tapenaga o lea taligamalo, le afioga Fiame Dr Naomi Mataafa, na ia faailoa ai le auai uma mai o atunuu o sui o Malo o le Taupulega i lana saunoaga faalaua’itele, e faailoa ai le tulaga ua iai nei tapenaga.

O ia tapenaga a le Malo e pei ona faailoa e le Palemia o loo faatino ma faafoe e le komiti tele le national task force, ma e 12 komiti galulue o loo iai, lea o loo gafa ma matafaioi mo vaega uma tau i nofoaga mo le fono, apitaga, taavale ma auala o femalagaa’iga, puipuiga ma le saogalemu, fesoota’iga ma faalauiloa, faapea le lesitalaina o usugafono, taumafa ma mataupu togia, atoa ai ma polokalame faapitoa o le a faatino i le vaiaso ua atofa mo lea fonotaga e pei ona amata i le aso 21 o Oketopa ae mae’a i le aso 26 o le masina fou lava.

O le saunoaga faalaua’itele foi a le tamaitai Palemia na ia faafetai ai i nuu ma afioaga mai le malaevaalele faavaomalo i Faleolo ma aga’i mai i le talafatai o Apia i le lagolagoina o le faamoemoe o le Malo e ala i le tapenaina faamatagofie o nuu ta’itasi.