Ua faailoa se finagalo o le ta’ita’i o le vaega faaupufai e puipuia aiā tatau a tagata i le feiloa’iga masani ma tusitala, ma ia faaleo ai ona popolega i le saogalemu o le soifua o tagata faimalaga i le va o motu o Upolu ma Savaii, pe a taunuu ia Setema le vaa fou o fausaga o le ituaiga o le catamaran, lea e mafai ona ave ai pasese ma taavale.
O se fausaga e lē tutusa ma vaa o loo faaaogā i le taimi nei ma o le faavae lea o popolega o le susuga Tuilaepa L Sailele Malielegaoi.
O atugaluga ma popolega o le ta’ita’i o le vaega faaupufai e puipuia aiā tatau a tagata ua tali iai lē na tusia le ata o lea fausaga o vaa o ia lea o Dr Stuart o le ta’ita’ifono foi o le kamupani o le Seatransport Pty Ltd.
Ua faailoa e lea tagata e iai ona tomai faapitoa i lea ituaiga o fausaga o vaa la’upasese ma uta i sona finagalo i le nusipepa o le Sunday Samoan, e sesē ma lē sa’o mau ua faavae ai le finagalo o Tuilaepa.
Ua ia faaalia o le vaa o le a faaaogā i Samoa ua iai uma vaega mo le saogalemu ma ua fausia foi e fetaui ma malaga i ogasami o loo feoa’i ai vaa la’upasese ma uta i Samoa i le va lea o Mulifanua ma Salelologa.
O se taimi muamua o le a faaaogā ai i Samoa lea ituaiga o fausaga fou o vaa la’upasese ma uta o le sami o lona tau e 23 miliona tālā.
Ua faailoa e le Minisita tausi mo le faalapotopotoga o vaa e lē o se nonogatupe ua faatau mai ai lea vaa fou, ae o tupe ia a le pulega o uafu ma taulaga ua teu faafaigaluega i le faalapotopotoga o vaa e ala i le faaaogā e faatau mai ai le vaa fou.
Le tofa Olo Fiti Afoa Vaai o le minisita o le malo tausi mo le faalapotopotoga o vaa a Samoa ma le pulega o uafu ma taulaga.
Mo le silafia o le vaa la’upasese fou ua faaigoa o le MV Lady Naomi II e mafai ona ave ai pasese e 500 ma taavale e 50.
