O loo faaauau pea ona tuu atu le tau’au fesoasoani a le malo o Niu Sila i le Pasefika e ala i a’oa’oga i tomai faapitoa eseese e pei ona aga’i atu iai sui o le auaunaga o le Soifua Mālōlōina a Niu Sila, mo se tasi o polokalame faalea’oa’oga tāua mo foma’i Samoa.
O lenei faamoemoe na aga’i tonu lea i le saga faamausalī o tomai ma le silafia o foma’i e mafai ai ona tali atu i ma’i tigāina e autovaa atu i maotagasegase.
O lenei polokalame e ta’ua o le Strengthening critical care capacity in the Pacific, e faatautaia lea e le New Zealand Medical Treatment Scheme.
E lua aso sa faatino ai polokalame faalea’oa’oga i Samoa, ma e faamauina o le sui sinia o le falema’i i Hawkes Bay, senior ICU Consultant ia Dr Ross Freebairn ma lona soātau, poo le expert support ia Dr Chris Poynter ma le susuga i le foma’i ia Dr Gerard Moynihan o Ausetalia, na faatinoina nei polokalame.
Māua i le pepa o faamatalaga, e 10 foma’i faauuina ma tausi soifua faamauina e 18 na auai i lenei polokalame faalea’oa’oga.
Faailoa e sui auai o latou lagona fiafia i le maua ai o lea avanoa e su’esu’e atili ai i vaega e agatonu i le tausia ma le vaaia lelei o gasegase o loo feagai ma ma’i tugā poo ma’i tigaina.
Ta’ua foi e le tamaitai foma’i, Dr Cecilia Vaai-Bartley le telē o le tāua o lenei polokalame.
Faaailo foi e le tamaitai foma’i le telē o le fesoasoani i le galulue soosoo tau’au ma asosi ma faalapotopotoga faapei o le Pasifika Medical Association ma sui eseese o le auaunaga faalesoifua mālōlōina na aga’i atu mo le faatautaiga o a’oa’oga o le Basics aemaise o le mafai ai e sui o le Matāgaluega o le Soifua Mālōlōina a Samoa ona maua le avanoa e fetufaa’i ma faasoa ai manatu i vaega eseese o le latou pitolaau.
Faamauina o lenei polokalame faalea’oa’oga, na mafai ona faatino e tauala atu i le lagolago a le New Zealand Ministry of Foreign Affairs and Trade, ma tuufaatasia ai e le Pasifika Medical Association Group.
Puna o Faamatalaga: https://pmagroup.org.nz/updates/nzmts-strengthening-critical-care-capacity-in-the-pacific-nzmts-delivers-intensive-training-in-samoa
