Ua faamauina i lenei masina o Iulai se aofa’iga maoa’e o tagata i atunuu o le Pasefika e aofia ai ma Samoa ua aafia i āuga o le gasegase o le fiva ponaivi lea e 18,766.
O le 12 afe o ia gasegase sa faamaonia o āuga o le fiva ponaivi mai su’esu’ega faafoma’i.
Ua faailoa ia faamaumauga e le faalapotopotoga o le soifua mālōlōina o le lalolagi a o taumafai ai le matāgaluega o le soifua mālōlōina i lo tatou atunuu e faatino puipuiga o le mamalu o le atunuu o alala i nofoaga eseese o itumalo o le Vaimauga, Faleata, Sagaga, ma se vaega o le itumalo o A’ana, lea o loo pito to’atele tagata ua aafia ai i āuga o lea faama’i.
Ua faailoa e le Matāgaluega o le Soifua Mālōlōina i ana auala o fesoota’iga, le toe faagasolo o le galuega o le fanaina o nofoaga o loo nonofo ma tautuufua ai namu i nofoaga o iai falea’oga i ia itumalo, ma o loo faia ai foi ma polokalame faalauiloa mo le faailoaina o auala o puipuiga.
E to’alua fanauiti i lo tatou atunuu ua faamaonia ua fano ola ona o āuga o le gasegase o le fiva o ponaivi poo le dengue fever.
