O tau fou o oloa tau suauu i Samoa e aofia ai le kiso, penisinisi ma le kalasini mo lenei masina fou o Oketopa, ua faato’ā alu ifo ai i lalo mai le 3 tala i le lita le tau o le penisini.

O lea ua pa’ū ifo i le 2 tala 98 sene e faatusa i le 3 tala 17 sene i le lita sa iai i le masina o Setema.

Ua molimauina foi le pa’ū maualalo o le tau o le kalasini mo Oketopa i le 2 tala 68 sene i le lita ae o le suauu kiso ua faaitiitia le tau i le 3 tala 8 sene i le lita e faatusa i le tau sa iai i le masina na te’a nei sa 3 tala 27 sene i le lita.

O tau uma nei ua faaalia e le Minisita o Tupe o loo faatulaga mai i le tau o nei oloa mo le masina o Aokuso i le atunuu o Sigapoa.

Ua faailoa e le Minisita o Tupe le afioga Lautimuia Afoa Uelese Vaai i le pepa faalauiloa o tau fou o suauu ma penisinisi, ua iai popolega i le tau o nei oloa ona o taua i Sasae Tutotonu ua avea ma auala e siitia ai, ma ua lē mafai ai foi ona faatumauina le tau o le paelo suauu mai le 6 tala i le 7 tala Amerika sa pa’ū ai i le masina o Aokuso.

O le suiga o le tau mo nei oloa e afua mai i le maualalo o le tamaoaiga o le lalolagi aemaise le aga’i i lalo o le tamaoaiga ma le mana’omia e le atunuu o Saina o suauu.