I le faamauina ai o le aofa’iga e 5,670 o tagata i le atunuu ua faamaonia ua maua i āuga o le faama’i fiva o ponaivi poo le dengue fever talu mai Ianuari o le tausaga nei, o fuainumera lata mai ua iloa ai le faaopoopo pea o tagata i Samoa ua aafia i āuga o le faama’i.

I le saunoaga faalaua’itele a le tama’ita’i Palemia o le malo tausi e faatatau i le pepesi o le fiva o ponaivi sa ia faailoa ai faamaumauga a le matāgaluega o le soifua mālōlōina. 

O loo faaauau le galuega a le ofisa tutotonu o faalavelave faafuase’i a le atunuu poo le NEOC i le polokalame o le fagaina o nofoaga o loo tuufua ai iniseti o namu.

O se galuega e lē gata o lotoā a a’oga ma potu a’oga ae o loo faatino foi i nofoaga faitele.

E 225 falea’oga i Upolu ua mae’a ona oo iai lea galuega, faapea le 97 o falea’oga i lo tatou motu o Savaii.

Ua iai se galuega ua fuafua e aoina ai lapisi tetele ua faatulaga e faagasolo i le aso 13, aso 20 ma le aso 27 o le masina nei o Aokuso.

O le Matāgaluega o Tinā ma Tama’ita’i, Atina’e o Afio’aga ma Aga Fesoota’i o le a latou asia aiga e 2,045 i nuu o loo maualuga ai le tulaga lamatia.

Ma o lea asiasiga ua tauala atu i le polokalame o le aiga ma nuu manuia a lea matāgaluega.