Ua tuu atu e le Iuni Lakapi a Aukilani i leoleo se mataupu e aofia ai le una’ia o se laufali o taaloga i le faai’uga o le vaiaso.
O ata ua agiga i le social media i le vaiaso nei o loo iloa atu ai le una’ia o se laufali e se tama taalo ma pa’ū ai i le palapala i le faai’uga o se taaloga i Aorere Park i Magele i le Aso Toonai talu ai.
O loo ta’ua i le RNZ o le taaloga sa faia i le va o le Laulii Lions ma le United Brothers ma i se pepa o faamatalaga mai le Auckland Rugby ua faailoa ai e le Ofisa Sili o Jarrod Bear o le latou popolega e mo le saogalemu o laufali ae i se lipoti lata mai ua ta’ua ai o loo manuia lē na aafia ma toe foi i galuega.
Fai mai le Ofisa Sili i lea lipoti o laufali o sui e ave iai le faatāua a le Iuni ma e leai se avanoa e tuuina i ni uiga sauā e faia iai ma e lē fia faia sa latou faatalanoaga ona ua tuuina atu le mataupu e faia iai se iloiloga.
E lē o ta’ua se faamatalaga mai leoleo i le mataupu ae lē taumate o loo galulue ai i su’esu’ega.
Puna o Faamatalaga: https://www.rnz.co.nz/news/sport/529436/attack-on-auckland-rugby-referee-referred-to-police
