I le tula’i mai ma amata faalauiloa le vaega faaupufai fou o le Samoa Ua Potopoto (Samoa Uniting Party), aemaise foi ana anavatau, ua faatulaga mai ai ma le ata o lana LOGO poo lana faailoga faalauiloa, o ni alofilima se lima.
E eseese faauigaga sa taumatemate iai le tele o finagalo faaalia i luga o fesoota’iga televavave i ni vaega o loo faatusa iai pe faaatagia mai e lenei LOGO, ae i se tasi o a latou faasalalauga faalauiloa, ua faamatala ai le uiga tonu o lenei LOGO.
O le alofilima muamua lea e pipii i le mata’itusi P, o loo faatusa iai tinā uma o le atunuu, e amata mai lava i tinā matutua se’ia pā’ia tinā laiti.
O le alofilima lapo’a o loo pipii i le pito i luga, o loo faatusa iai tamā uma o le atunuu.
Sosoo ane ai le alofilima e peiseai o loo misi se tamatama’ilima, o loo faatusa iai i latou e iai aafiaga tumau.
O le alofilima pito la’itiiti o loo faatusa iai tupulaga lalovaoa poo alo ma fanau laiti o le atunuu.
O le alofilima i le pito lava i lalo, o loo faatusa atu ia i latou o le ‘aufaifaatoaga ma le ‘aufaifaiva poo le ‘augalulue uma i totonu o lo tatou atunuu.
Ma o le uiga foi lea o le igoa o le vaega faaupufai lenei, Samoa Ua Potopoto ona o lima nei ua faaata mai ai le tāaofa’iga uma o tagatānuu o Samoa.
E pei ona silafia, o lenei vaega faaupufai fou, o loo auai uma iai le afioga i le tamaitai Palemia ma Minisita o le faigāmalo tausi i le taimi nei, faatasi ai ma nisi o sui fou ua filifili e lagolago atu iai ma faasauni ai e tauva i nisi o nofoa o itumalo i le faigāpalota tele o le a alo atu iai le atunuu i le masina o Aokuso o le tausaga lenei, 2025.
