E lē o se mea faigofie na tula’i mai i le faigāmalaga a le ulugalii o Dale ma Jason Clark mo tafaoga i Bali, ina ua sa’e faafuase’i le vaala’upasese na aga’i atu ma le to’atele o tagata ma turisi, ina ua tā e se galu tele le vaa.
Ta’ua e lenei ulugalii, ina ua ta i latou e le galu pau le vaega na molimauina o fanau ua featofa’i solo i le taualuga o le vaa, ma faalogoina le faataitaiō o tagata ua fetagisi.
Faamatala e i la’ua nei, sa o la taumafai lava e pipii mau i soo se itu o le vaa ina ia ‘aua ne’i tā e le galu peitai na iloga lava ona featofa’i i laua ma taia atu i isi tagata ona o le malosi tele o le galu na aafia ai lo latou vaa.
Ta’ua e pei ua o la vaai o featofa’i solo pepa lūlū i nai tagata a o sa’e ai le vaa.
I lipoti, e faapea e 3 aso o iai le ulugalii Tauranaga i Bali mo tafaoga ae tula’i mai loa le faalavelave.
Faamatala e Dale ma Clark, toeiitiiti lava a taunuu le vaa i Sanur Harbour ae vaaia loa le galu telē lava o aga’i mai i le itu agavale o le vaa, a o mālōlō ai i le potu mālōlō o le vaa.
Ma na o la iloa lava e sa’e le vaa ona o le telē ma le malosi o le galu.
E tusa ai ma lipoti mai ofisa faasalalau mai fafo, e faapea pe ā ma le to’a valusefulu tagata na i luga o le vaala’upasese i le taimi na tula’i ai le falalavelave, ma sa aga’i atu mai Nusa Penida mo Sanur.
Na tula’i mai lea faalavelave i le itula e 3 i le aoauli.
E 3 tagata na maliliu e aofia ai se tagatānuu Saina ma se tagata faigaluega o le vaa o se Indonesia.
Puna o Faamatalaga: https://www.nzherald.co.nz/nz/bali-fatal-ferry-capsize-new-zealand-couple-recounts-terrifying-ordeal/57WVPMSW6BA3XKNHZ4D5M5PQPA/
