Ua faamaonia moliaga o le fasioti tagata faamoemoeina, o le peresitene o le kegi a le Mongrel Mob i Taupō, le alii o Teina Williams, i le maliu ai o le sui o le kegi a le Black Power o Ryan Woodford.
O le 4 vaiaso talu ai lea sa faagasolo ai lava i le Faamasinoga Maualuga i Rotorua, faamasinoga na tula’i ai Williams, e 34 tausaga o lona matua i ona moliaga nei i le maliu o Woodford.
Na atoa le ‘afa aso o aga’i le laulau o faatonu poo le jury e faatalanoa se latou faai’uga, ma o ananafi la a o le’i tāina le 5 i le afiafi na foi ane ai loa le jury ma le latou faai’uga ua auaufaatasi iai, e faamaonia moliaga o le fasioti tagata faamoemoeina o Teina Williams.
Ta’ua i le lipoti a le Newstalkzb, e tusa ma le to’aiva security guards na tutula’i i luma ma autafa o le anoanoa’i o tauaiga ma uo na lolofi atu e fia faalogo i le i’uga o lenei faamasinoga.
Na momoli le faafetai a le faamasino, Justice Michele Wilkinson-Smith i le mamalu o le atunuu na auai atu ona o uiga faaaloalo ma le to’afilemu sa faaalia i le taimi atoa a o faagasolo lenei faamasinoga, ma sa lapata’ia ai foi i latou ina ia tausi pea le to’afilemu ma aga faatamalii pe a oo i le taimi e faitau ane ai le i’uga.
O le isi alii na faamaonia lona moliaga mai lenei lava faalavelave ma maliu ai Ryan Wood, o Marty Durham, e tauave le tofiga o le second in command i le latou kegi.
Na vave ona ioe Durham i lona moliaga o le fasioti tagata pa’ivalea a o le’i amata faagasolo lona faamasinoga, i le maliu ai o Ryan Woodford.
O lea la ua faatali nei le aso o le a lauina ai le faasalaga mo nei alii uma e to’alua.
Puna o Faamatalaga: https://www.newstalkzb.co.nz/news/national/taupō-mongrel-mob-president-teina-williams-guilty-of-black-power-member-s-murder/
