E 31 tausaga le matua o se tama ua fai toalua e to’afā lana fanau, ua faasala tupe i le 2 afe tala ma nofo vaavaaia i le 12 masina, ina ua faamaonia lona moliaga o le ave taavale faatamala na maliu ai se tamā ua fai lona aiga e to’alua ona alo.
O Fili Moananu Pu’ea o Lotofagā Safata sa molia e mafua i se faalavelave na aafia ai le ola o se tamā i le taavale na ia aveina.
O faamaumauga a leoleo sa tuuina atu i le faamasinoga ua faailoa ai, o lē na fano le soifua sa moe i le auala ae alu atu ai le taavale a lē ua molia ma afaina ai le ulu poo le ao o lē ua maliu.
Faaalia e leoleo ia latou faamaumauga o lē ua maliu sa auai i se inuga ma se tasi o lona aiga, ma o le mae’a o le inuga na aga’i ai i lo latou fale peitai sa lē mafai e le tasi o alii e maupaolo i le aiga o lē ua maliu ona ave i le fale lē ua maliu ina ua taoto ane ma moe i se vaega o le alatele i Saanapu.
O le 9 i le po na tuua ai e le taavale a lē ua molia le falema’i i Safata ma aga’i ese e fia o i lo latou aiga ae pe tusa o le 10 i le po lava lea na lavea ai lē ua maliu e pei ona faaalia i le faai’uga, o le pa’u pito i luma o le itu taumatau o le taavale na aafia ai le ao o lē ua maliu.
Na fai le sala a lē ua molia i le nuu e sefulu afe tala, sa faia foi le ifoga i le aiga o lē ua maliu ma ave ai le isi sefulu afe tala, fitu ie tetele ma le selau pusaapa i’a e fesoasoani ai i le lau’ava.
Na talia e le faamasinoga le folasaga a leoleo e lē talafeagai se faasalaga faafalepuipui ae o se sala tupe ma nofo vaavaaia.
O le lua afe tala ua faasala ai Fili o le a tuuina atu i le tina le toalua o lē ua maliu, ma ua faatonuina foi ia feiloa’i ma le to’alua o lē ua maliu e faia iai se faamaulaloga ona tasi lea o atugaluga o le tina, e lei oo atu lē ua molia e la te feiloa’i.
E 3 masina e tatau ona totogi ai le sala tupe, a lē usitai e 4 masina e nofosala ai i le falepuipui.
E selau foi itula o le a galue fua ai lē ua molia mo le lelei o tagata lautele.
