Ua aumai i se tulaga faalauaitele se finagalo o le Matāgaluega o Tupe a le Malo e faamalamalama ma faamanino ai nisi o faasalalauga ua latou faailoa e lē sa’o ma ua ta’ita’i sese ai le atunuu, e faatatau i le faaaogāina o meatotino e pei o taavale ma isi aseta tāua a le malo ma e faitauina faapenei:
“Ua tuuina atu lenei Pepa o Faamatalaga ina ia faasa’o ma faamanino atili ai matāfaioi faaletulafono a le Matāgaluega o Tupe, i ona tiute faavae i le puleaina ma le mata’itūina lelei o tupe a le Mālo, faapea le faasoasoaina tatau o punā’oa (e aofia ai le faatauina, faagaioiga, tausiga, ma le tusiesea o meatotino ma aseta a le Mālo), e ala atu i le Tala o le Tupe, e pei ona iai i lalo o le Tulafono mo le Pulega o Tupe a le Mālo 2001”.
“Ina ia mautinoa le manino ma le mafai ona tali atu i tiute tauave mo le puleaina lelei o aseta ma meatotino a le Mālo, aemaise le vaoia o le faaaogā lē tatau e Matāgaluega, Faalapotopotoga Tuma’oti a le Mālo, ma soo se Ofisa o le Palemene, o lea na faataoto ai e le tatou Mālo, tulafono ma faiga faavae e tatau ona mulimulita’ia:
• Faatonuga Faatausi Tupe 2013 (faavaeina i lalo o le vaega 127 o le Tulafono mo le Pulega o Tupe a le Mālo 2001).
• Tulafono Faatonutonu mo Taavale a le Mālo 2015 ma ona teuteuga faaletulafono 2019 ma le 2024 (faavaeina i lalo o le vaega 126 (1) o le Tulafono mo le Pulega o Tupe a le Mālo 2001).
• Faiga Faavae Lautele mo le Tausiga ma le Mata’itūina o Aseta ma Meatōtino a le Mālo 2024”.
“Mo le mata’itūina ma le faafoeina lelei o tupe a le Mālo, ua iai le Faatonuga Faatausi Tupe 2013, o loo au’ili’ili atu ai faamatalaga ma faiga faavae e tatau ona mulimulita’ia, i le faaaogāina o tupe a le Mālo. O le Faiga Faavae Lautele mo le Tausiga ma le Mata’itūina o Aseta ma Meatōtino a le Mālo 2024, o le faiga faavae mo le Mālo atoa, e limata’ita’iina ai le faafoeina o aseta e faatupeina e le Mālo, ma tuuina atu mo le faaaogāina e Matāgaluega ma Faalapotopotoga uma a le Mālo. O loo tuuina atu foi i lenei faiga faavae ia ta’iala mo le faatauina, faaaogāina, tausiga, ma le tusiesea o aseta, faapea foi fuafuaga mo le puleaina ma le tausiga lelei o nei aseta”.
“E iai le tiute a tagata faigaluega uma a le Mālo, ina ia mautinoa le faaaogāina tatau ma le malupuipuia o aseta uma a le Mālo.
O le Tulafono Faatonutonu mo Taavale a le Mālo 2015 o loo faamanino atu ai tofiga taualoa a le Mālo e agavaa i taavale mo le faaaogāina. I le 2019, sa teuteuina ai lenei tulafono faatonutonu e faamanino ai aiaiga mo le faaaogāina o taavale ma sa faaopoopoina i ai le vaega 3B, e faatonuina ai le toe faafo’iina mai o taavale sa faaaogāina e le Fofoga Fetalai, le Sui Fofoga Fetalai, le Ta’ita’i o le Itu Agai faapea Minisita Lagolago, i totonu o le tasi le vaiaso mai le aso e soloia aloa’ia ai le Palemene o Samoa1. Ona o lea itu, o lenei aiaiga mo le toe faafo’iina mai o taavale a le Mālo pe a soloia le Palemene, e lē o se faiga fou. O loo atagia mai foi i lea tulafono faatonutonu, tiute faaletulafono a le Matāgaluega o Tupe e tuliloaina ai le mulimulita’ia e i latou e agavaa i taavale a le Mālo, le toe faafo’iina mai o taavale i lalo o aiaiga ma le taimi ua faatulagaina atu i lalo o le tulafono.
O loo iai foi le Komiti Galue mo Taavale a le Mālo e ta’ita’ifono ai le Matāgaluega o Tupe, ma e aofia ai sui mai le Matāgaluega a le Palemia ma le Kapeneta, Matāgaluega a Leoleo ma Falepuipui, Matāgaluega o Faalapotopotoga Tuma’oti a le Mālo, le Komisi o Tagata Faigaluega a le Mālo, faapea le Pulega o Fela’ua’iga i le Laueleele, e nafa ma le faamalosia o lea tulafono faatonutonu, ina ia usita’ia e Ofisa uma a le Mālo, auā lava le puleaina ma le vaaia lelei o aseta tau taavale a le Mālo”.
“O le ‘auga o lenei Pepa o Faamatalaga e faapea; o Matāgaluega uma a le Mālo o loo faatupeina mai Tala o le Tupe a le Mālo, e tatau ona usita’ia uma aiaiga o le Tulafono o le Pulega o Tupe a le Mālo 2001, tulafono faatonutonu ma faiga faavae, lea e aiaia ai le faaaogāina o tupe, meatotino ma aseta a le Mālo e aofia ai ma taavale a le Mālo”.
