O le asō o loo faamanatuina ai i le atunuu le tetee atu i gaioiga e aafia ai le isi tagata, i lona faaperetaniaina o le bullying.

Ua faaaogāina ai le la’eiina o le lanu piniki e faaalia ai lou tetee i nei gaioiga.  

Ma i le faamanatu ai o lenei aso tāua, ua faaalia ai le aga’i o le silasila a le tele o faalapotopotoga i le faatupula’ia o matāupu o loo tau i aafiaga e tauala mai i luga o auala faatekonolosi, ma upega tafa’ilagi le cyberbulling i totonu o Niu Sila.  

Ua ogatusa foi lenei faamoemoe ma se tasi o fuafuaga a le malo ua amata talanoaina. O fuafuaga o loo aga’i tonu lava i le ono tapu ai o fanau e i lalo o le 16 tausaga le matutua ona faaaogāina upega tafa’ilagi poo le social media. 

Manatu o se fuafuaga tāua i le itu o le saogalemu i fanauiti mai aafiaga i luga o le itulau eseese o le social media.  

Mai faamaumauga, e silia ma le 2000 o matāupu ua faamauina “o le 

faasoesa e faaaogāina ai ala tau fesoota’iga faaneionapo” poo le online harassment i totonu o le 2 tausaga, ma e silia ma le 2/3 o i latou aafia o tamaitai.  

Faamauina foi, o le 37% o ē aafia o tupulaga talavou e 21 tausaga le matutua ma lalo ifo.

Mai lipoti a le Faalapotopotoga ua faaigoaina o le Organization for Economic Co-operation and Development, o Niu Sila le atunuu e maualuga ai lava le numera o nei aafiaga mai le li’o o atunuu, o sui auai i totonu o lenei faalapotopotoga tele i le lalolagi.

I le faatupula’ia ai o lenei faafitauli, ua tuu mai ai ni fautuaga mai nisi o tagata taualoa o le atunuu, ina ia ave le faamamafa a le malo ma le tele o faalapotopotoga ma asosi i itu tau a’oa’oga ina ia saga faalaua’itele ai le malamalamaga o le to’atele i lenei matāupu.

E lē gata i lea ia taga’i foi i ni auala e talafeagai mo tagatānuu eseese o loo aumau i totonu o Niu Sila.  

Puna o Faamatalaga: https://www.rnz.co.nz/news/chinese/561194/cyberbullying-in-spotlight-amid-proposed-social-media-ban