E lē o se faatasiga faapolokiki poo se sauniga faapitoa i se ekalesia le faamoemoe na faataunuuina i le po anapo i le faaitu o Smithfield i Sini peitai na saunoa le faafeagaiga o Faamanu Laussen mai le Faith City Church, o se faamoemoe ua aofia potopoto ai tagatanuu o Samoa e faamanatu ma patipatia le alofa o le Atua ia Samoa ma le atoaga o le 62 tausaga o lona tutoatasi.
O le sauniga lenei e faia i tausaga taitasi ma e aofia ai ekalesia eseese, o se taumafaiga na tuufaatasia e le Sootaga poo le Network o loo galulue ai nisi o faafeagaiga Samoa i Sini, ma na faatumulia ai le nofoaga o le ekalesia a le susuga i le faafeagaiga, Viliamu Aufai ma le Grace Point Smithfield.
O le asō o loo faagasolo ai nisi o polokalame a le komiuniti Samoa i Sini e pei ona masani ai i le faailogaina o le tutoatasi o Samoa e aofia ai le faatauina o taumafa Samoa, faatinoina o faafiafiaga faasamoa e faamanatu ai pea tu ma aga a si o tatou atunuu i vaega eseese ua aumau ma nopiai ai ana tamafanau.
