O gasegase poo faama’i lē pipisi e pei o le suka ma gasegase o le fatu, o loo taulamua i faafitauli o loo feagai ma tagata i le Pasefika, o se faamatalaga lea mai ia i latou e telē le tomai i tulaga tau le soifua maloloina.
Lipotia e le RNZ Pacific o mafuaaga tetele ia e lua ua mātele ina ma’umau ai soifua.
Saunoa le sui faatonu aoao o le Science and Capability i le Pacific Community o Dr Paula Vivili, ua avea ia faafitauli ma faasalaga oti mo le toatele o tagata ona e masani ona lē maua ni avanoa mo ni togafitiga.
Fai mai le fomai pe ā ma le 70 pasene o tagata e maliliu i le Pasefika e maliliu mai faama’i lē pipisi.
O le mataupu lea o loo laualuga i le fonotaga o loo faatautaia i le Atu Kuki i le vaiaso nei, le Pasifika Medical Association conference.
Na saunoa foi le alii fomai mai le Iunivesite o Aukilani, Sir Colin Tukuitonga o le avamalosi le isi mafuaaga ma ua fia vaai i ni tulafono e faatatau i le faatauina atu ma le faatau mai o avamalosi, e lē gata ina maua ai faafitauli tau le soifua maloloina ae e afua ai foi ma nisi faafitauli tau le soifuaga o le tagata.
