E 12.1 ua oo iai nei le pasene o numera o tagatānuu o loo i Aotearoa nei ua faamauina ua leai ni galuega.

Mai ia pasene ua faalauiloa e le Ofisa o Faamaumauga le Stats NZ, ua faaalia ai ua faaluaina le numera o tagatānuu o le Pasefika i le atunuu ua feagai ma lenei faafitauli.

O se numera ua faaalia ai popolega a le faalapotopotoga o le Salvation Army, ma o le latou iloa o le a faateteleina. 

I faamaumauga mo le kuata o Iuni, na faamauina ai o le numera poo le average rate o le atunuu sa 5.2% – 0.5% ua maualuga ai mai le la tausaga, ae ta’ua o le maualuga lea ua iai o se pasene tele lea talu mai le tausaga e 2020. 

Mo tagatānuu Pasefika lava ia e 3.8% lea ua maualuga ai i totonu o le 12 masina. 

Faaalia e le sui o le Salvation Army, o se social policy analyst o Ana Ika, o loo manino lelei le le maulauga o le numera i le faafaigatā ona maua o galuega a nisi ma le lē maua ai foi o avanoa i nisi mo a’oa’oga i lenei vaitau. 

Faamanino foi e Ana Ika, o le latou maitau o le to’atele o i latou e lē o iai ni galuega o tupulaga talavou. 

E tusa ai ma faamaumauga a le Stats NZ pe ā ma le 2000 galuega ua faamutalia pe ua taofia foi ona toe faaauau i le kuata o Iuni. 

I le silia ma le 12 masina ae ua faapena ona oo lea numera i le 16,000.

Ta’ua e Ana Ika, o nai o tatou tagata Pasefika o loo aafia tele i tulaga o loo iai lenei vaitau, ona o ituaiga galuega o loo latou filifili e galulue ai.

Puna o Faamatalaga: https://www.rnz.co.nz/international/pacific-news/569214/unemployment-rate-for-pacific-people-more-than-double-national-average