O le tuumalo o le alii pese lauiloa i le Pasefika ia Fiji, ua molimauina ai le to’atele o tagatānuu Pasefika ua faatino sa’afi’afiga mo le alii pese.
Ua salalau ai faamafanafanaga mai tagata eseese mai itu e fā o lenei kelope, faaalia o latou moomooga alofa i lenei alii ma lona sao i pese ma fātuga i le tele o tausaga; ma o nisi ua faaalia ua iloga ona papa’i atu ana fātuga ia i latou.
Ua oo lava i tagata taualoa ua faatino faamaisega e pei ona iai le tama’ita’i Faipule o Amerika Samoa le congresswoman o Aumua Amata.
O tagata pespese lauiloa foi mai le Pasefika ua faaalia o latou lagona i le tuumalo ai o lenei alii, ae o le faasoa ai i le sao tele o Fiji ia latou taumafaiga.
A o molimauina ai pea le oo mai o faasalalauga ma tusitusiga a tagata i le maliu ai o Fiji, o lea ua molimauina foi le tuu mai ai i luga o upega tafa’ilagi o le Twitter, le tusia ai o sa’afi’afiga a le alii fai ata tifaga o Seiuli “The Rock” Dwayne Johnson mo George Fiji Veikoso.
Sa faaalia ai foi e le alii lauiloa Samoa ona alofa’aga e tusa ai ma le la’ua mafutaga ma Fiji.
Ma i lana tusitusiga sa ia faailoa ai le telē o le sao o Fiji i le faalauiloaina o le Atu Pasefika i ana musika ma fātuga.
I lea sa’afi’afiga na ia faafetaia ai le alii pese mo lona agaga e faasoa lana taleni ma tagata uma.
O le tasi o pese na toe usuina ma teuteuina e Fiji o le pese My Way, ma faaalia e Seiuli o se pese e pele tele ia te ia ona o se pese e manatua ai pea le tua’ā tamā a lona tinā, Peter Maivia, o se tasi o alo ta’uta’ua a Samoa ua iloga i le lalolagi i le taaloga o le pii o le wrestling.
Puna o Faamatalaga: https://jang.com.pk/en/43551-dwayne-johnson-pens-somber-tribute-to-late-music-icon-fiji-heartbroken-news
