O le Aso lulu o le vaiaso fou lea o le a fuafua e toe faaauau ai le mataupu I le nofoa faaopoopo mo tamaitai I le Palemene lea na talosaga ai le itu tagi poo le vaega faaupufai a le Faatuatua I le Atua Samoa ua Tasi, FAST  ina ia soloia lea nofoa faaopoopo.

I le maea ai o sueusega a le faamasinoga I le asō lea ua tuu mai ai le faaiuga e faaleaogaina ai le talosaga a le Ofisa o le Loia Sili ina ia taofi le tagi a le FAST e faatatau I lea mataupu.

O le Aso Gafua o le vaiaso fou lea ua fautuaina ai Loia e toe tapena uma ai pepa mo finauga i lea mataupu ona faaauau ai lea o le suesueina o lea mataupu autu i le Aso Lulu.

Mo le taimi nei o loo fa’aauau pea le galulue ai o le HRPP I le vaaia o le atunuu ma na taua e Galumalemana Tipi Autagavaia e leai se agaga popole o le atunuu I le umi ai ona tālia o se iuga o lea mataupu, pau le naunautaiga ina ia soalaupule lelei e le faamasinoga.