O le faamasinoga o faigāpalota e pei ona lu’i ai e nisi o sui faatutū o le palota tele ia Aokuso agavaa o nisi o sui tauva ma faai’uga a le Komesina o faigāpalota, o le tasi o tagi na amata ai galuega a lea faamasinoga i le Aso Lulu o lenei vaiaso ua faalēaogā ma ua lē mafai ona su’esu’eina.
O le tagi lea a le sui tauva o le vaega faaupufai o le Faatuatua i le Atua Samoa ua Tasi le afioga Muaaufaalele Mary Faafouina Taeu sa lu’i ai le agavaa o le sui tauva o le vaega faaupufai o le Samoa ua Potopoto le tofa Leatinuu Wayne Sooialo i le monotaga faalenuu.
O le fofogaina o lea tagi sa muamua finauina ai e le loia a Leatinuu le tulaga faaauau o su’esu’ega a le faamasinoga i le lu’i lenei ona ua na o le tagi sa faaulu ae leai ni faamatalaga tusitusia e faailoa atu ai i le faamasinoga ni mau e lagolago ai lea finauga.
Sa polili atili le finauga e le loia le afioga Fuimaono Sarona Pomifasio i se talosaga e faalēaogā ai le su’esu’eina o le tagi e ala i le talosaga ua ta’ua o le strike out motion.
I sa’ili’iliga a le faamasinoga o palota i mau sa tuuina atu e le loia a le itu tagi ma mau mai le loia a le itu sa molia, na taunuu ai i le faai’uga e faalēaogā le lu’i sa tuuina atu, ona e lē mafai e le faamasinoga ona su’esu’e e aunoa ma ni mau.
A toe tatala foi le avanoa i le itu tagi e faamae’a atu ai tapenaga i le tapena atu o mau tusitusia poo affidavits, o le silasila a le faamasinoga e utiuti le taimi ua tapena ai le faigāpalota tele a le atunuu ma ua lē talafeagai sea fuafuaga.
O le mafua’aga lea na faalēaogā ai le lu’i faasaga i le agavaa o le monotaga sa faaulu e le sui faatū o le Faatuatua i le Atua Samoa ua Tasi.
Ua talia ai foi e le faamasinoga ma le talosaga e taofia le su’esu’eina o le finauga a le itu tagi.
O le a aumai mafua’aga o le faai’uga i se tulaga au’ili’ili i le taimi e folasia ai faai’uga uma o tagi e iva o loo tagofia nei e lea faamasinoga, lea ua faatulaga o le aso 15 o Aokuso e tatau ona fofogaina ai.
O le mae’a ona tagofia o lea tagi faasaga i le agavaa o le monotaga faalenuu na amata valaau ai molimau o le tagi a Leatinuu ua lu’i ai le monotaga faalenuu a Muaaufaalele Mary Faafouina Taeu.
E fitu molimau a le itu tagi ma o le tofa Leatinuu na muamua su’esu’e lana molimau lea sa ia faailoa i le faamasinoga ina ua tu’i fesili e le loia a le itu o loo molia, e talu mai le tausaga e 2022 e oo mai i le tausaga nei 2025 e le’i faia se monotaga a Muaaufaalele.
O le asō o loo faaauau ai ona su’esu’e molimau o lea matāupu tau faamasinoga o le faigāpalota.
O loo iai le isi lu’i a le sui tauva o Leatinuu Wayne Sooialo e autū foi i le monotaga faalenuu faasaga i le tasi o sui tauva mo le itumalo faapalota o Faleata 2 o le tofa Ulugia Elon Piliopo Betham.
O lea matāupu ua faatulaga e le faamasinoga e su’esu’e i le Aso Lua o le vaiaso fou le aso 5 lea o Aokuso.
