Ua faalēaogā i se faai’uga a le afioga i le Faamasino Sili le afioga Satiu Simativa Perese, le talosaga a le loia le susuga Sefo Ainuu sa finau ai e totogi atu e lē sa faauluina le tagi o se lu’i i le agavaa o se sui faatū o le patī faaupufai e puipuia aiā tatau a tagata, le silia i le fitu afe tala.

O lea totogi e aga’i tonu i tapenaga o molimau e to’avalu, o le malaga i Savaii o le loia ma le tapenaina o le mau tetee faasaga i le lu’i na molia ai le tofa Pipi Pauli Tevita Tariu.

I le vaiaso ua mavae na tolaulau ai mo le valaauga muamua lu’i e sefulutasi e faatulaga ai aso e su’esu’eina ai, sa faailoa ai e le loia a lē na tagi le toe faaui i tua o le lu’i a Leatigaga Matafai Lauina Iiga.

Sa faailoa manino ai i le aso lea le taliaina e le loia a le sui tauva sa molia, lona maliega i lea tulaga, ae sa faailoa ai e le loia ma se isi tapenaga o le a ia tuuina atu o le talosaga lea i se totogi.

Faaalia e le Faamasino Sili i lana faai’uga e lē fesiligia le puupuu o le taimi o tapenaga uma a le atunuu i le palota tele faafuase’i ma e lē fesiligia ai tupe faaalu a sui tauva i lu’i tau i agavaa auā o se vaega o le tulafono a le Palemene na faia i le faamoemoe, e tuliloa ai le amiotonu ma le faamaoni o sui faatutū ia latou tapenaga.

Ua faamalieina le faamasinoga o le taimi na faailoa ai le toe ave i tua o lea tagi ua talafeagai lelei ma e leai foi se isi tau faaopoopo mo itu auai o le faamasinoga.

O le finauga a le loia sa tuuina atu lenei finauga, ia silasila ai le faamasinoga ia ogatasi ma totogi o le finauina o talosaga e taofi ai ni tagi poo strike out motions.

Pau lea o le vaega ua talia e le faamasinoga e agavaa iai ni finauga i ni totogi ae o le totogi o le tapenaga i le teena o tuua’iga faasaga i le lu’i o agavaa o sui tauva ua teena ma faalēaogā.

I se tala mai galuega a le faamasinoga o faigāpalota o le Aso Lua na faaui ai i tua se tasi o tagi o se lu’i faasino i le agavaa o sui faatutū.

O le tagi lea sa faaulu e le afioga Tuala Toiaivao Tevaga Iosefo Ponifasio o le sui tauva o le patī faaupufai o le Samoa ua Potopoto, sa molia ai le sui tauva tutoatasi le afioga Lauano Mulivai Lauano Pa’u.

Ua tolu ai tagi o lu’i faasaga i agavaa o sui faatutū ma faai’uga a le Komesina o faigāpalota ua faaui i tua e ala i maliega o itu na faauluina ma itu sa molia e aunoa ma le tagofia e le faamasinoga o palota.

E ese mai lea i tagi e tolu e le’i saofia pe e le’i mafai ona su’esu’eina e mafua i ni finauga o mau faaletulafono.