Na faate’ia le to’atele o tagatānuu o loo aumau i itu Saute o Aukilani i le aoauli o le aso ananafi ina ua sasao ane se afi i se tasi o nofoaga i Mangere.
Ta’ua i lipoti mai le NZ Herald, o lenei nofoaga, o se townhouse complex o loo fausia ni fale fou ma e faamauina e lei mae’a galuega ae pagā ua faaleagaina i le malaia.
Pe tusa o le ‘afa tonu o le itula e 12 i le aoauli na logoina ai le Ofisa o le Tineimu ma Faalavelave Faafuase’i e faailoa atu le faalavelave ua tula’i mai i le Hain Ave.
E oo atu le tineinu ua matua’i aafia lava se tasi o fale fogafale tolu.
Ma e tusa ai ma se ata pu’e i luga o upega tafa’ilagi o le Facebook na iloa ai le sasao o le afi ma le ausa uliuli ua ufitia ai lea faaitu talu ai lenei faalavelave.
Ta’ua faato’ā mafai lava ona tapē le afi poo le itula e 2 ma na faamaonia mai e se sooupu mai le vaega o tineimu, e leai se tasi na aafia, na iai foi tagata su’esu’e o mū e iloilo tulaga o le tula’i mai ai o lea mū.
O loo faasolo pea su’esu’ega i le taimi nei.
Puna o Faamatalaga: https://www.nzherald.co.nz/nz/mangere-fire-large-fire-engulfs-incomplete-apartment-building/
