Ua faalauiloa mai nei e le vaega faaupufai a le National fuafuaga i suiga o le a iai nisi o aiaiga o visa mo matua o tagatnuu Niu Sila o loo aumau i atunuu e mamao, (migrant parents).
O lenei visa e ta’ua o le Parent Boost Visa, ma ua tele folafolaga a le malo e tusa ai ma lea faamoemoe.
O nei suiga fou o le a vaaia ai le ono oo atu i le 10 tausaga le umi e mafai ai e se matua ona aumau i Niu Sila, i lona faatulagaga, e 5 tausaga e amata ai pe a talia le talosaga, ma le isi 5 tausaga e faaopoopo pe a toe faafou le visa.
O faanaunauga a le malo i le faatino ai o nei suiga, ina ia faatumauina pea le fia malaga mai o tagata o isi atunuu i totonu o Niu Sila ma aumau ai ma galulue ai, aemaise i tagata o loo iai tomai ma agavaa faapitoa, ma o le latou tilotilo o le mafai ona filifili o ia tagata e aumau i Niu Sila o le a tuuina ai se fesoasoani i o latou aiga.
I le faalauiloa mai ai o suiga, o lea ua faailo ai ma aiaiga ma taiala mo tagata e talosga atu i lea visa, e aofia ai:
- E tatau ona iai se tasi e lagolagoina le malaga mai o le matua, ma lona aumau ai i le atunuu poo se sponsor, o se tagatānuu Niu Sila, poo se sitiseni o le atunuu.
- E tatau ona ia ausia aiaiga o siaki a fomai – medical or health requirements
- Ia iai se inisiua, e oo atu i le $250,000 le aofai mo le tali i faalavelave tupu faafuase’i poo le emergency ma le $100,000 mo togafitiga mo le gasegase o le kanesa ma le toe faafoi i o latou atunuu na soifua ane ai – cancer coverage ma le repatriation.
O nisi o tuutuuga mo sponsors e aofia ai a latou seleni poo totogi.
E ui i se fiafia o le National i se latou taumafaiga ma fuafuaga faataatitia, ae ua upuia e le Greens lenei suiga.
E manatu le Greens e faailogatagata lea fuafuaga, i le itu lea, e lē gafatia e tagata uma lea faamoemoe.
E manatu e na o tagata maumea ma maua le tele o tupe o le a manuia i lenei faamoemoe, ae mo tagata lautele e lē maumea ma maualalo totogi o le a lē manuia ma lē mafai ona faatino aiaiga ua faatulaga mai e le National.
Puna o Faamatalaga: https://www.nzherald.co.nz/nz/politics/government-announces-new-visa-to-allow-migrants-parents-to-visit-nz-for-up-to-10-years